Patrice Treuthardt, « Moin nana in péi » et « Kosa in soz »

Moin nana in péi

pou Nicolas M'Tima ek son bann dalon Radio arc-en-ciel
in péi
          moin nana in péi
kosa sa i vé dir
sa i vé dir      sat mi koné
ou lépa tousèl si la ter-bondié
                    saminmminm out salvert-kominyon
                    saminmminm out bondié-paviyon
                              out kaz kréol an boisoutol
                              out payas-béton dann sité-pétrol
partou ousa ou sava
tout bann domoun-la ou koné
          domoun osi i koné aou
tout bann piédboi-la ou koné
          piédboi osi i koné aou
tout bann galé-la ou koné
          galé osi i koné aou
tout bann langaz-la ou koné
          langaz osi i koné aou
                    saminmminm out salvert-kominyon
                    saminmminm out bondié-paviyon
                              out kaz-kréol an boisoutol
                              out payas-béton dann sité-pétrol
épi      si in jour
ou kit out péi
ou vann larmoir sanm lo li
wa trouv toujour in moun
                              in kaz osi
inonsa      in pié-shandel
pou aspèr aou dann péi-la
in péi
moin nana in péi
          si in jour mi mor
          antèr amoin simétir Le Port
          la rasine la mer va monté
          va nétoiy mon kor avek dë lo-d sel
          La Pointe des galets galé galé
                    soley i dor dan la mer
          li rèv dann fon Titan
                    fé mazine amoin mon péi boi-d lé

                                                                                                    2 novembre 2003

kosa in soz

kosa in soz
         tanbour lor sou la tèr
sat la di safran      la di bélié
sat la di safran      la di ri zone
sat la di safran      la di servis 
sat la di safran      lapa di in boubou i lans 
an silans      kom listoir mon péi
dann silans la tèr
         dann silans la pèr 
                  dann silans la mor
mon boubou-d soufrans i démann in soulazman
                                                      baya...
( inn ti voi i sort dan la tèr i di : )
     done ali in kou-d lo safran siouplé

Ces deux poèmes de Patrice Treuthardt, « Moin nana in péi » et « kosa in soz » (« Tanbour lor »), sont lus par l’auteur sur le disque Kozman maloya (poèt larénion n° 2) produit par les éditions K’A à Marseille en 2000. Le texte des poèmes et son enregistrement sont reproduits sur Île en île avec la permission de l’auteur et des Éditions K’A.

© 2000 Patrice Treuthardt ; © 2000 Patrice Treuthardt et Éditions K’A pour les enregistrements audio


Retour:

 

http://ile-en-ile.org/patrice-treuthardt-deux-poemes/

mis en ligne : 8 février 2006 ; mis à jour : 1 novembre 2015